Það er hálf súrrealískt að pæla í því að við séum að horfa uppá Íslandsmót að byrja í maí.

Auðvitað eru sérstakar ástæður fyrir því varðandi efstu deildina en það að bikarinn byrji svo snemma segir margt um að fleiri hafa áhuga á að vera með í alvöru leikjum, nokkur lið sannanlega utandeildarlið sem er afskaplega skemmtilegt og gefur bikarkeppninni meiri lit í fyrstu umferðunum klárlega.

Gaman verður að sjá hvernig veðrið fer með vellina nú þessa næstu daga en það má ekki verða aðalmálið. Íslenskur fótbolti snýst svo hrikalega mikið um að vera tilbúinn í ólíkar aðstæður, hvort sem er veður eða vellir.

Ég allavega vorkenni ekki leikmönnum nútímans að "þurfa" að spila leiki á gervigrasvöllum eða í innanhússknattspyrnuhöllum, þó auðvitað grasið sé bestu aðstæður fyrir boltann.

Það er nú ekki langt síðan að Þórsarar og Leiftur léku fyrstu leiki sína í efstu deild á malarvöllunum sínum og til voru lið í næstefstu deild sem léku alla leiki sína á möl, SÆLLAR MINNINGAR!

Af þeim samtölum sem ég hef átt við erlenda leikmenn tala þeir um þetta sem ákveðinn sjarma og upplifun, að spila í 25 metrum í Eyjum eða á sundurlausum og blautum Árbæjarvellinum í miðju rjóðri!

Náðu auðvitað ekki leik á legendary mölinni á Sigló, sem var heiður að fá að upplifa sem heimavöll, það var grýla sem hræddi margan andstæðinginn og var okkar tólfti maður.

Svo skulum við ekki láta okkur detta það í hug að leikmenn kvíði fyrir hraðmótinu í byrjun efstu deildar, þeir kvíða miklu frekar pásunni í mótinu þar á eftir. Það er langskemmtilegast í fótbolta að spila leiki og eitthvað sem gleður hug leikmanns. Vissulega munu þjálfararnir þurfa að dreifa álaginu en það á bara að hjálpa þeim liðum sem hafa undirbúið ALLA leikmenn sína í vetur.

Alltaf beið maður eftir því að undirbúningstímabilinu væri lokið og maður færi að spila reglulega. Á ferlinum upplifði maður ólíkar leiðir á undirbúningstímabilinu með ólíkum þjálfurum.

Eddie May þjálfaði okkur hjá KS, m.a. á steyptu gólfi í íþróttahúsinu á Sigló í byggingu. Það var erfitt skutl hjá markmanninum get ég sagt!

Janus Guðlaugs kynnti mann Hafnarfjörð í löngum útihlaupum og massafótbolta í gamla Haukahúsinu.

Höddi Júll lét moka smá part úr snjóskaflinum á Sigló og við æfðum í snjó í þrjár vikur minnst.

Youri Sedov lét okkur sippa stanslaust og vera í reit. Ferlega gott að losna við útihlaupin en við vorum í ENGU formi í mótinu. Hann á samt uppáhaldsæfinguna mína í heiminum, u.þ.b. 25.júní var slyddubylur á Sigló og síðasta æfing fyrir leik við Ægi. Karlinn var afskaplega upptekinn af fótkulda og boðaði okkar á æfinguna Í STÍGVÉLUM!!! Shit hvað ég vildi eiga mynd af þeirri æfingu.

Stórvinur minn og leikjahæsti knattspyrnumaður Íslands, Anton Mark Duffield á svo toppinn í undirbúningstímabilsæfingu þegar útihlaupsæfing í efstu götu Siglufjarðar skyndilega beygði upp í snjóskafl og hélt áfram langleiðina upp í Hvanneyrarskál. Ég viðurkenni hér að hafa lítið gaman af löngum útihlaupum (eins og er skylda hjá markmanni) en í dag er þessi æfing ljóslifandi í minningunni og mómentið þegar við beygðum upp í fjall magnað. Í dag æfir Mark á fullri ferð.......FJALLAHLAUP!

Talandi um beygjur þá var Njalli Eiðs óborganlegur á sínu útihlaupstímabili, hann var auðvitað alltaf fyrstur og þegar einhverjir voru komnir fram úr honum þá bara beygði hann inn næstu götu og varð aftur fyrstur, því þeir sem voru á undan urðu þá auðvitað að snúa við. Hann lét okkur aldrei vita af leiðinni fyrirfram, því þá gat einhver unnið hann!

Eintómir snillingar og í raun er jafn gaman að rifja upp undirbúningstímabilin og þau gátu verið leiðinleg meðan á þeim stóð!

En svo kom mótið og allt vetrarpuðið gleymdist í þeirri skemmtun að æfa sig á góðum velli og undirbúa sig undir næsta leik. Í dag eru þjálfarnir að teikna upp fyrsta leikinn, kannski Fylkir og Valur undanþegnir út af Deildarbikarúrslitunum, og æfingarnar í þessari viku munu markast af þeim undirbúningi, þó kannski veðrið muni spila inní þann undirbúning!

Svo gleðilega hátíð við öll, er sannfærður um að íslenskur fótbolti verður verulega skemmtilegur í sumar, í öllum deildum karla og kvenna verður spilaður betri bolti en áður!