Þorlákur Árnason þjálfari Stjörnunnar var að vonum svekktur eftir að Valsstúlkur slógu þær út í átta liða úrslitum Valitor bikarsins með 1-0 sigri í Garðabænum í kvöld.
„Þetta eru gríðarleg vonbrigði, við ætluðum okkur að komast áfram. Þetta voru bara slagsmál, mér fannst við nú fá fleiri færi í leiknum og fram að markinu fannst mér við betri í heildina. En svo kom smá örvænting í þetta eftir að þær skoruðu,“ sagði Þorlákur við Fótbolta.net.
Eina mark leiksins kom eftir tæpan klukkutíma þegar Caitlin Miskel skoraði með frábæru skoti, en þó virtist Stjarnan ekki sækja nógu stíft eftir að þær lentu undir, heldur vantaði bit fram á við.
„Það getur vel verið. Þú vilt heldur ekki gefa Val mark númer tvö eða þrjú. Við reyndum að breyta en það vantaði bara gæði fram á við hjá okkur í dag til þess að skora. Í dag fannst mér bara að liðið sem myndi skora á undan vinna, og því miður gerðu Valsmenn það.“
