Vonar að Hörður snúi fljótlega til baka úr erfiðum meiðslum

Hörður, sem getur bæði spilað sem miðvörður og vinstri bakvörður, sneri aftur til æfinga í sumar og spilaði æfingaleik með Panathinaikos í byrjun september.

Hann hefur hins vegar ekki enn spilað keppnisleik eftir meiðslin. Age Hareide, landsliðsþjálfari Íslands, var spurður út í Hörð á fréttamannafundi í dag.

„Fyrir einum og hálfum mánuði leit það vel út og hann var byrjaður að æfa. Ég held að það hafi komið smá bakslag í endurhæfinguna," sagði Hareide.

„Hann er með góðan vinstri fót. Hann lenti í alvarlegum meiðslum en vonandi getur hann komið fljótlega til baka svo við höfum fleiri möguleika. Það er mikilvægt. Við reynum alltaf að velja bestu leikmennina."

Það er vonandi að Hörður snúi aftur fljótlega en Ísland þarf á sínum bestu varnarmönnum að halda.