Ísland er á toppnum í riðlinum með 18 stig, einu stigi meira en Holland.

Liðin eigast við í Utrecht á morgun en jafntefli dugir liðinu til að komast á HM.

Íslenska liðið er í ágætis gír. Liðið gerði þrjú jafntefli í riðlakeppni EM í sumar, meðal annars við lið Frakklands og þá vann það 6-0 stórsigur við Hvíta-Rússland á dögunum.

Harpa er mjög bjartsýn á að Ísland fari alla leið á HM.

„Bara ljómandi vel og sérstaklega að vera komin hingað. Þetta er geggjaður völlur, toppaðstæður og tvö frábær lið."

„Þær eru örugglega spenntar. Ég held að þær reyni að ná tökum á spennustiginu og tilhlökkun er aðaltilfinningin fyrir þessa leiki og það er það sem þær lifa fyrir þessa stundina," sagði Harpa er hún var spurð út í íslenska hópinn.

Harpa gerir ekki ráð fyrir því að Þorsteinn Halldórsson, þjálfari liðsins, geri margar breytingar á liðinu.

„Nei, það hugsa ég ekki. Held að það verði ekkert óvænt. Bara nokkuð í takt við það sem er búið að vera að byggja upp síðustu misseri."

„Ég held að það sé erfitt að segja. Það væri óeðlilegt að gera miklar breytingar, enda stutt á milli leikjanna. Síðasti leikur spilaðist mjög vel en að því sögðu er þessi leikur allt annars eðlis og spurning hvort hann vilji fara varnarsinnaðri inn í hann eða hvað."

Sigurinn gegn Hvíta-Rússlandi kom liðinu í betri gír fyrir leikinn og var Harpa mjög sátt við spilamennsku liðsins í þeim leik.

„Já, frábært fyrir svona verkefni að fá þannig leik til þess að fá sjálfstraustið í gang. Það er mjög jákvætt hvað við skoruðum mörg mörk og hvað við vorum að búa til margar álitlegar stöður inn í teignum og að sama skapi fáum við ekki mark á okkur, sem er gott."

Léttir pressuna að vita að eitt stig sé nóg
Holland er með mikið af sterkum sóknarmönnum og má þar helst nefna Vivianne Miedema, leikmann Arsenal á Englandi. Hún hefur verið með bestu sóknarmönnum heims síðustu ár. Íslenska liðið gæti því þurft að liggja aftur á morgun en Harpa segir liðið á heimavelli þegar það kemur að varnarvinnu.

„Þar erum við algjörlega á heimavelli. Það er staða sem við þekkjum og erum slatta af varnarmönnum í þessu liði þannig við hljótum að geta varist."

En mun það eitthvað trufla liðið að vita að það þarf aðeins eitt stig til að komast á HM?

„Nei, það léttir það aðeins á pressunni ef við fáum mark á okkur þá er styttra í að geta komið til baka. Það er plús en við erum alltaf að fara inn í þennan leik til að vinna hann," sagði hún ennfremur.

Hún var að lokum spurð út í vonir Íslands um að fara alla leið í lokakeppnina, en Harpa kom þar inná það að hún væri rosalega bjartsýn.

„Ég er rosalega bjartsýn. Hef passað mig að vera temmilega bjartsýn en ég er samt virkilega bjartsýn," sagði Harpa, en hversu stórt er það að komast á HM?

„Það væri risastórt," sagði hún í lokin.

Leikurinn annað kvöld hefst klukkan 18:45 að íslenskum tíma. Það er mikið undir og mikil spenna framundan.