Milan er áfram í öðru sæti ítölsku deildarinnar eftir 3-1 sigur á Roma á San Síró í kvöld. Gestirnir fengu tvö rauð spjöld í leiknum og Rui Patricio varði vítaspyrnu frá Zlatan Ibrahimovic í lokin.
Það voru heimamenn sem voru í öllum boltum í byrjun leiks og þurfti Rui Patricio að verja öflugt skot frá Theo Hernandez strax á fyrstu mínútunum.
Leikmenn Milan kölluðu eftir því að dómarinn myndi skoða atvikið aðeins betur en boltinn fór af handleggnum á Tammy Abraham áður en Patricio varði. VAR skoðaði atvikið og eftir smá umhugsun ákvað dómarinn að dæma víti. Olivier Giroud steig á punktinn og skoraði. Fimmta deildarmark hans á þessari leiktíð.
Níu mínútum síðar var Roger Ibanez skúrkurinn í liði Roma en slæm sending hans til baka varð til þess að Giroud átti skot í stöng áður en Junior Messias hirti frákastið og skoraði. Þriðja markið hjá þessum fyrrum sendibílstjóra.
Bæði lið skiptust á að fá færi áður en Tammy Abraham minnkaði muninn. Roma fékk horn sem var skallað frá. Lorenzo Pellegrini átti skot sem Abraham komst inn í og stýrði í netið.
Dómarinn var spjaldaglaður í leiknum og rak einn úr þjálfaraliði Milan upp í stúku undir lok fyrri hálfleiks. Hann hafði fengið aðvörun í leiknum en hlustaði ekki og því fór sem fór.
Nicolo Zaniolo kallaði eftir vítaspyrnu í uppbótartímanum eftir að hann féll í teignum eftir viðskipti sín við Sandro Tonali en ekkert dæmt.
Milan fékk tvö færi í byrjun síðari hálfleiks til að loka leiknum. Fyrst var Rade Krunic í dauðafæri en ákvað að skjóta ekki áður en Brahim Diaz átti skot í slá.
Mike Maignan, markvörður Milan, átti því næst tvær frábærar vörslur. Tvær frá Henrikh Mkhitaryan og eina frá Roger Ibanez en inn vildi boltinn ekki. Nóg af færum í þessum leik og Roma að vinna sig inn í leikinn en liðið varð fyrir áfalli á 74. mínútu er Karsdorp fékk sitt annað gula spjald og þar með rautt fyrir brot á Hernandez.
Alessandro Florenzi tók aukaspyrnuna en boltinn hafnaði í þverslá. Á 82. mínútu tryggði Milan sigurinn. Zlatan Ibrahimovic var búinn að vera inni á vellinum í rúmar þrjár mínútur áður en hann lagði boltann fyrir Rafael Leao með brjóstkassanum og keyrði Leao í gegn og skoraði laglegt mark.
Zlatan fékk fullkomið tækifæri til að skora undir lokin er Gianluca Mancini braut á Leao innan teigs, Mancini fékk sitt annað gula og rautt en Rui Patricio varði frá Zlatan. Lokatölur 3-1 fyrir Milan sem er í 2. sæti með 45 stig en Roma í 7. sæti með 32 stig.
Sex marka jafntefli hjá Lazio
Lazio gerði 3-3 jafntefli við Empoli. Gestirnir komust tveimur mörkum yfir í leiknum á fyrstu átta mínútunum með mörkum frá Nedim Bajrami, úr víti, og Szymon Zurkowski tveimur mínútum síðar.
Lazio kom til baka með marki frá Ciro Immobile á 14. mínútu áður en Sergej Milinkovic-Savic jafnaði þegar tæpur hálftími var eftir af leiknum. Federicio Di Francesco kom Empoli aftur yfir á 75. mínútu og fékk Immobile tækifæri til að jafna á 87. mínútu en klúðraði vítaspyrnu sinni. Mark frá Milinkovic-Savic undir lokin sá til þess að Lazio fengi að minnsta kosti stig á heimavelli.
Cagliari lagði þá Sampdoria 2-1. Gestirnir lentu undir í leiknum en komu til baka og skoruðu tvö mörk. Leonardo Pavoletti gerði sigurmarkið þegar tuttugu mínútur voru eftir. Sassuolo og Genoa gerðu 1-1 jafntefli og þá gerði GIanluca Caprari bæði mörk Hellas Verona sem vann Spezia, 2-1.
Úrslit og markaskorarar:
Lazio 3 - 3 Empoli
0-1 Nedim Bajrami ('6 , víti)
0-2 Szymon Zurkowski ('8 )
1-2 Ciro Immobile ('14 )
2-2 Sergej Milinkovic-Savic ('66 )
2-3 Federico Di Francesco ('75 )
2-3 Ciro Immobile ('87 , Misnotað víti)
3-3 Sergej Milinkovic-Savic ('90 )
Milan 3 - 1 Roma
1-0 Olivier Giroud ('8 , víti)
2-0 Junior Messias ('17 )
2-1 Tammy Abraham ('40 )
3-1 Rafael Leao ('82 )
3-1 Zlatan Ibrahimovic ('90 , Misnotað víti)
Rautt spjald: ,Rick Karsdorp, Roma ('74)Gianluca Mancini, Roma ('90)
Sampdoria 1 - 2 Cagliari
1-0 Manolo Gabbiadini ('18 )
1-1 Alessandro Deiola ('55 )
1-2 Leonardo Pavoletti ('71 )
Rautt spjald: Antonio Candreva, Sampdoria ('90)
Sassuolo 1 - 1 Genoa
0-1 Mattia Destro ('6 )
1-1 Domenico Berardi ('55 )
Spezia 1 - 2 Verona
0-1 Gianluca Caprari ('59 )
0-2 Gianluca Caprari ('70 )
1-2 Martin Erlic ('85 )
Rautt spjald: Kevin Agudelo, Spezia ('88)
Athugasemdir