Bandaríkin eru komin í úrslitaleik í kvennaflokki Ólympíuleikanna eftir 1-0 sigur gegn Þýskalandi í dag.

Bandaríkin voru talsvert sterkara liðið í fyrri hálfleik en tókst ekki að setja boltann í netið. Seinni hálfleikurinn var talsvert jafnari og fengu bæði lið færi til að skora en staðan hélst markalaus og því var gripið til framlengingar.

Sophia Smith skoraði snemma í framlengingunni til að taka forystuna fyrir Bandaríkjakonur og reyndu þær þýsku að svara fyrir sig, en án árangurs.

Báðar þjóðir komust nálægt því að bæta marki við leikinn en markverðirnir stóðu fyrir sínu. Lokatölur urðu 1-0 og er ljóst að Bandaríkin munu spila um gullið á meðan Þýskaland spilar um bronsið.

Brasilía og Spánn mætast í seinni undanúrslitaleik dagsins innan skamms.