„Við spiluðum fína vörn og vorum agaðir, þeir fengu ekki mörg tækifæri í leiknum," sagði Hallgrímur Jónasson miðvörður Íslands eftir 1-0 tap gegn Mexíkó í vináttulandsleik í Las Vegas í nótt.
Lestu um leikinn: Ísland 0 - 1 Mexíkó
„Það er aldrei gaman að tapa og við töpuðum á föstu leikatriði sem við erum ekki ánægðir með. En það er klárt mál að þegar við fengum ekki mikinn tíma til að æfa fyrir leikinn og gátum ekki æft það nógu vel þá erum við ekki eins góðir og við erum vanalega," hélt hann áfram.
„En leikurinn var fínn varnarlega og í fyrri hálfleik fannst mér koma nokkur moment þar sem við spiluðum vel upp völlinn. En það er klárt mál að við hefðum viljað gera aðeins betur með boltann."
Hallgrímur var sjálfur að spila sinn 16. landsleik og er lang reynslumesti leikmaður íslenska liðsins. En hvernig var að spila með svona mörgum ungum strákum?
„Það var bara fínt, það var í mörg horn að líta, að við myndum vinna rétt varnarlínan, bæði að lyfta upp og færslurnar því þeir voru svo mikið með boltann. En við töluðum vel saman og mér fannst við ekki skapa mjög mikið. Við hlýddum allir upplegginu mjög vel, en ég hefði viljað að við hefðum verið rólegri á boltanum þegar það var svæði til þess og gætum skapað aðeins meira, því við vorum ekkert voða líklegir til að skora."
Nánar er rætt við hann í sjónvarpinu hér að ofan.
Athugasemdir
