Daníel Finns Matthíasson, leikmaður Leiknis, var ekki í hópnum í gær er liðið gerði markalaust jafntefli við Víking í Bestu deildinni en hann vill komast frá félaginu.
Daníel, sem er 21 árs gamall sóknarþenkjandi miðjumaður, er uppalinn í Leikni og steig sín fyrstu skref með meistaraflokki liðsins fyrir sex árum síðan.
Hann hefur verið fastamaður í liðinu síðustu þrjú tímabil og hafði átt afar gott undirbúningstímabil í ár. Síðasta sumar skoraði hann eitt mark og átti tvær stoðsendingar í efstu deild.
Í útvarpsþættinum Fótbolti.net var sagt að viðræður væru í gangi milli Stjörnunnar og Leiknis um kaupverðið á Daníel en fleiri félög vilja fá hann. Greint hefur verið frá því að Daníel vilji yfirgefa Leikni.
Þegar Fótbolti.net ræddi við Sigurð Heiðar Höskuldsson, þjálfara liðsins, á dögunum þá vildi hann ekki svara spurningum um Daníel en leikmaðurinn var á bekknum gegn ÍBV í síðustu viku. Hann kom þá inná en var ekki sjáanlegur í gær þegar liðið gerði markalaust jafntefli við Víking.
Sigurður var spurður út í stöðuna í gær en tjáði sig lítið um málið.
„Ég veit bara ekki stöðuna á því," sagði Sigurður eftir leikinn við Víking.
Ólíklegt að Benyu komi
Leiknismenn hafa skoðað það að fá Kundai Benyu frá Vestra fyrir lok gluggans en Sigurður telur ólíklegt að hann mæti í Breiðholtið.
„Við höfum alveg pælt í því eins og ég hef sagt áður en mér finnst það mjög ólíklegt," sagði hann í lokin.
Sjá einnig:
Vildi ekki svara spurningum um Daníel Finns
Athugasemdir