Þór vann sterkann sigur á Kórdrengjum í fyrstu umferð Lengjudeildarinnar um helgina. Leik lauk með 1-0 sigri liðsins en Harley Willard skoraði markið eftir frábæran undirbúning Jewook Woo.
Woo kom inn á sem varamaður snemma í leiknum en hann var að spila sinn fyrsta mótsleik fyrir félagið. Hann kom inn á fyrir Fannar Daða Malmquist Gíslason sem þurfti að fara af velli vegna meiðsla.
Hann varð fyrir því óláni að festast í grasinu í Boganum og slasa sig í hnénu. Aðstaðan í Boganum hefur verið mikið á milli tannanna á fólki en Guðmann Þórisson fyrirliði Kórdrengja gagnrýndi KSÍ meðal annars, í viðtali við Fótbolta.net, fyrir að leikurinn hafi farið fram í Boganum.
Daði Bergsson leikmaður Kórdrengja þurfti einnig að fara af velli vegna meiðsla í leiknum.
Þorlákur Árnason þjálfari Þórs býst við því að Fannar verði frá næstu vikurnar.
„Það er ekki vitað, hann verður frá í einhverjar vikur við vonum að þetta sé ekki alvarlegt, það lítur út fyrir að þetta sé ekki alvarlegt en hann er klárlega frá næstu vikur myndi ég giska," sagði Þorlákur.
