Ísak Bergmann er 17 ára gamall en hann gekk til liðs við Norrköping á síðasta ári frá ÍA.

Hann hefur heldur betur heillað í byrjun leiktíðar í Svíþjóð og hefur tekist að vinna sér inn sæti í byrjunarliði Norrköping.

Jóhannes Karl Guðjónsson, þjálfari ÍA, er faðir Ísaks, en hann ræddi við Fótbolta.net um frammistöðu hans í Svíþjóð.

„Hann er að uppskera eftir vinnunni sem hann er tilbúinn að leggja á sig. Frábær fótboltaheili og góður í fótbolta en fyrst og fremst búinn að leggja hart að sér og klár í að spila í Allsvenskunni," sagði Jóhannes við Fótbolta.net.

„Frammistaðan hefur verið frábær. Leggja upp mörk og skorar sitt fyrsta mark sem er frábært en hann er bara rétt að byrja.

„Miðað við hvernig undirbúningstímabilið var og hvernig það þróaðist þá var hann að spila ansi mikið og þetta leikjastopp, þetta byrjaði ekki á réttum tíma en það hafði engin áhrif á hann. Hann var duglegur að æfa og ætlaði sér að vera í toppstandi þegar hann fengi tækifærið og hann greip það."

„Hann þarf að halda áfram að vinna fyrir hlutunum en hann er að fara að spila helling á þessu tímabili sem er frábært," sagði hann ennfremur.

Jóhannes átti afar sjálfur frábæran feril en hann var spurður að lokum hvor væri beri, hann eða Ísak?

„Hann er mikið betri," svaraði Jóhannes án þess að hugsa sig tvisvar um.