„Við byrjum vel, náðum að pressa þá hátt og náðum að halda boltanum vel. Við náðum kannski ekki að koma okkur góðar stöður ofarlega á vellinum," sagði Daníel Leó Grétarsson eftir tap íslenska landsliðsins gegn Norður-Írlandi í æfingaleik í Belfast í kvöld.
Lestu um leikinn: Norður-Írland 1 - 0 Ísland
„Fyrstu 20-30 mínúturnar voru góðar en svo fá þeir móment með sér og enda hálfleikinn vel. Við fáum mark á okkur og vorum heppnir að fá ekki á okkur annað. "
Daníel Leó var að spila sinn fyrsta landsleik undir stjórn Arnars Gunnlaugssonar.
„Þetta er fyrsta verkefnið sem ég með nýjum þjálfara. Auðvitað tekur það tíma að komast inn í kerfið, erum að spila allt öðruvísi en ég er vanur. Mér fannst ég koma ágætlega inn í þetta, fá sjálfstraustið til að stíga ofar á völlinn með boltann og fá að kynnast liðinu í þessum leikstíl."
Næst á dagskrá hjá íslenska liðinu er undankeppni HM sem hefst í september. Fyrsti leeikur er heimaleikur gegn Aserbaísjan og svo útileikur gegn Frakklandi.
„Við erum með gott lið og eigum góða möguleika. Við förum með gott sjálfstraust inn í þetta mót og vitum hvað við getum," sagði Daníel Leó.
Athugasemdir
