Leikmaður hjá stóru liði í dönsku úrvalsdeildinni var í dag kærður fyrir nauðgun og fyrir kynferðislega áreitni gegn tveimur öðrum konum, en ákærurnar voru staðfestar af borgardómi Kaupmannahafnar í dag.
Fyrsta atvikið átti sér stað á Imperial-hótelinu í Kaupmannahöfn í apríl á þessu ári en leikmaðurinn á að hafa þvingað konu til að hafa við sig munnmök þrátt fyrir að hún hafi margbeðið manninn um að hætta.
Leikmaðurinn er einnig kærður fyrir kynferðislega áreitni gagnvart tveimur konum í júlí og ágúst. Danskir fjölmiðlar segja þar að hann hafi kysst tvær konur gegn þeirra vilja.
Umræddur leikmaður og fórnarlömb hans eru ekki nafngreind í þessu tiltekna máli en hann spilar hjá toppliði í dönsku úrvalsdeildinni.
Samkvæmt frétt Viaplay er lögreglan enn að rannsaka málin og fara réttarhöldin fram fyrir luktum dyrum. Hann verður í tíu daga gæsluvarðhaldi og verður svo tekin ákvörðun um framhaldið, en leikmaðurinn neitar sök.
Leikmaðurinn gæti átt yfir höfði sér allt að átta ára fangelsi ef hann verður fundinn sekur.
