Þýskaland: Spennandi lokamínútur í Sinsheim

Hoffenheim og Köln gerðu 1-1 jafntefli á Rhein-Neckarleikvanginum í Sinsheim í þýsku deildinni í kvöld.

Ilhan Bebou og Wout Weghorst fengu báðir góð færi til að koma Hoffenheim yfir í fyrri hálfleiknum, en settu boltann yfir markið.

Köln komst betur inn í leikinn í þeim síðari og þegar aðeins ellefu mínútur voru eftir af venjulegum leiktíma kom markið. Hinn 19 ára gamli Max Finkgrafe skoraði þá fallegt aukaspyrnumark, sem hafnaði neðst í hægra horninu.

Heimamenn jöfnuðu seint í uppbótartíma. Króatíski framherjinn Andrej Kramaric fékk boltann í teignum, lagði hann fyrir sig með brjóstkassanum áður en hann þrumaði honum í stöng og inn.

Hoffenheim er í 8. sæti deildarinnar með 27 stig en Köln í 16. sæti með 16 stig.