Skoski vængmaðurinn Oliver Burke skoraði bæði mörk Werder Bremen í 2-1 sigri liðsins á Stuttgart í Evrópubaráttunni í þýsku deildinni í dag.

Smá ryð var í Burke snemma leiks og fór hann illa með dauðafæri þegar hann komst einn gegn markverði á 7. mínútu.

Tólf mínútum síðar kom Leonidas Stergiou heimamönnum yfir þegar hann fékk sendingu inn fyrir, sólaði markvörð Werder Bremen og setti boltann í autt netið.

Burke var staðráðinn í að bæta upp fyrir klúður sitt fyrr í leiknum og það gerði hann á 32. mínútu. Hann slapp aftur inn fyrir nema í þetta sinn setti hann boltann framhjá Alexander Nubel og í netið.

Nick Woltemade fékk úrvalsfæri til að koma Stuttgart aftur yfir snemma í síðari hálfleik en skallaði boltann framhjá og aðeins nokkrum mínútum síðar var hann rekinn af velli með sitt annað gula er hann steig á leikmann Bremen.

Þegar lítið var eftir af venjulegum leiktíma kom sigurmark Bremen. Leon Bittencourt sendi frábæra sendingu inn á teiginn á Burke sem skaut boltanum neðst í hægra hornið og tryggði gestunum sigurinn.

Mikilvægt hjá Bremen sem er með 42 stig í 9. sæti en vonir Stuttgart um að komast í Evrópukeppni fara minnkandi. Liðið er í 11. sæti með 40 stig, fimm stigum frá Evrópusæti þegar fimm umferðir eru eftir.