„Mjög svekkjandi, sérstaklega þar sem þetta var ekki aukaspyrna. Þetta var algjört rugl," sagði Ragnar Sigurðsson eftir 1-0 tapið gegn Tyrklandi ytra í kvöld. Ragnar var ósáttur við aukaspyrnudóminn sem Tyrkir skoruðu úr en var ánægður með varnarleik liðsins í heild í leiknum.
Lestu um leikinn: Tyrkland 1 - 0 Ísland
„Við duttum aftur í mjög góða liðsheildarvörn í dag, allir voru að hjálpa til og vinna saman. Það var ekkert vandamál. Það var bara svekkjandi að við náðum ekki að skapa fleiri færi."
Gríðarlegur hávaði og stemning var á leikvanginum.
„Það var bara gaman að þessu. Það er alltaf gaman að spila í svona stemningu," sagði Ragnar. Íslandi mistókst að landa sigri í þremur síðustu leikjum sínum í undankeppninni.
„Þessir þrír síðustu leikir skipta engu máli þegar við förum til Frakklands. Það var leiðinlegt að ná ekki sigri í síðustu þremur leikjunum en við lítum bara fram á við."
Viðtalið má sjá í sjónvarpinu hér að ofan.
Athugasemdir
