Úrúgvæ endar í þriðja sæti í Copa América í ár eftir að hafa sigrað Kanada í vítaspyrnukeppni í nótt.

Liðin mættust í skemmtilegri viðureign þar sem Rodrigo Bentancur tók forystuna fyrir Úrúgvæ en Ismael Kone náði að jafna fyrir Kanada á 22. mínútu.

Það ríkti jafnræði með liðunum sem skiptust á að stjórna leiknum en staðan hélst 1-1 allt þar til á lokakaflanum.

Jonathan David kom þá inn af bekknum og tók forystuna fyrir Kanada á 80. mínútu. Það virtist vera sigurmark leiksins en gamli refurinn Luis Suárez var á öðru máli og gerði hann jöfnunarmark í uppbótartíma til að knýja fram vítaspyrnukeppni.

Báðar þjóðir skoruðu úr fyrstu tveimur spyrnunum sínum en Ismael Kone og Alphonso Davies klúðruðu fyrir Kanada á meðan Úrúgvæjarnir skoruðu úr öllum sínum.

Luis Suárez skoraði úr fjórðu spyrnu Úrúgvæ og reyndist það sigurmarkið í vítakeppninni.

Argentína og Kólumbía mætast í úrslitaleik mótsins næstu nótt.