KR og Fjölnir mættust í seinni leik kvöldsins A-riðils í Reykjavíkurmótinu. Fyrr í kvöld lagði Þróttur R. lið ÍR.

Fjölnir var á toppi riðilsins eftir tvo leiki með fullt hús stiga. KR hafði einungis leikið einn leik í riðlinum og sá leikur vannst gegn Fylki.

KR komst yfir á 28. mínútu og bætti við öðru á 38. mínútu. Pálmi Rafn og Ægir Jarl með mörkin. Í stöðunni 1-0 fyrir KR fékk Fjölnir vítaspyrnu en Jóni Gísla Ström brást bogalistin á vítapunktinum og fór vítaspyrnan forgörðum.

Fjölnir náði að minnka muninn snemma í seinni hálfleik en þar við sat og sigur KR staðreynd. Næsta umferð riðilsins fer fram á sunnudag þegar Fylkir mætir Fjölni og KR mætir Þrótti.