Myndir: Í draumaheimi mætti flytja þennan völl í Laugardalinn

Leikurinn fer fram á Zaglebiowski Park Sportowy í Sosnowiec í Póllandi. Um er að ræða heimavöll Zaglebie Sosnowiec sem var að falla í C-deild Pólland.

Það er orðið frekar algengt að fara á velli erlendis og hugsa með sér: „þessi völlur væri nú flottur sem þjóðarleikvangur Íslands".

Þannig er það svo sannarlega núna hér í Póllandi. Kannski í einhverjum draumaheimi mætti bara flytja þennan völl í Laugardalinn og mála sætin blá og hvít. En það er draumaheimur, en líklega verður ekki komin ný og betri aðstaða fyrir fótboltalandsliðin okkar fyrr en kannski á næstu öld. Jafnvel er það bjartsýni.

Völlurinn er glænýr en hann var opnaður í fyrra. Hér er líka innanhúsvöllur fyrir boltaíþróttir og íshokkíhús.

Fótboltavöllurinn tekur rúmlega 11 þúsund manns í sæti og arkitektúrinn er virkilega flottur. Hér er allt mjög nýtt, flott, ferskt og það er engin hlaupabraut.

Meðfylgjandi eru myndir frá vellinum en leikurinn hefst klukkan 17:00 og er í beinni textalýsingu á Fótbolta.net.