Tottenham er mjög hrifið af Iraola
Andoni Iraola og Marco Silva eru tveir kostir sem Tottenham mun skoða ef félagið ákveður að reka ástralska stjórann Ange Postecoglou en þetta segir enska blaðið Telegraph í dag.
Postecoglou situr í heitu sæti eftir 2-0 tap liðsins gegn Fulham um helgina en Tottenham er í 14. sæti, þrettán stigum frá Evrópusæti þegar níu umferðir eru eftir.
Telegraph segir að Tottenham sé þegar byrjað að líta í kringum sig, það er að segja ef Postecoglou tekst ekki að bæta árangur liðsins.
Iraola og Silva eru taldir vera efstir á blaði hjá Tottenham, en Iraola hefur gert magnaða hluti með lið Bournemouth síðustu tvö ár og gert liðið að Evrópubaráttuliði á meðan Silva hefur náð góðum árangri með Fulham frá því hann tók við liðinu fyrir fjórum árum.
Tottenham mun þó ekki ráðast í þjálfarabreytingar fyrr en í sumar og hefur því Postecoglou enn tíma til þess að bjarga starfi sínu. Liðið er auðvitað komið í 8-liða úrslit Evrópudeildarinnar, en sigur í þeirri keppni er líklega eina von félagsins um að komast í Evrópukeppni á næsta ári.
Athugasemdir
