Stuðningsmenn Írlands voru ekki sáttir með byrjunina hjá íslenska þjálfaranum og fréttamenn hafa látið gamminn geysa.

„Hverjir halda þessir Írar að þeir séu? Nei, í alvörunni," sagði Tómas Þór Þórðarson í útvarpsþættinum þegar rætt var um byrjunina hjá Heimi.

„Þetta var ekki góð frammistaða og ég veit að það er ýmislegt í þessu... Við skulum átta okkur á því að þetta írska lið getur bara ekki neitt. Þeir eru búnir að fara á eitt stórmót síðustu 20 árin og það er ekki eins og þeir eigi einhverja ríka sögu í fótboltanum."

„Frægasti leikmaðurinn þeirra og sá besti er varamaður hjá Brighton í dag (Evan Ferguson). Næst mesta stjarnan í þessu liði er varamarkvörður Liverpool (Caoimhin Kelleher). Þeir þurfa að slappa af og átta sig á því hvar þeir eru. Líka á því hvað Heimir Hallgrímsson hefur gert fyrir þau lönd sem hann hefur þjálfað. Þetta er gæi sem fór beint á HM með Íslandi með þremur liðum sem höfðu verið á EM árið áður. Hann nær í stig gegn Argentínu og fer svo til Jamaíku að kenna liði sem hefur aldrei varist frá því þeir spörkuðu fyrst í fótbolta. Hann fer í átta-liða úrslit í Gullbikarnum og í úrslitaleik í Þjóðadeildinni í algjörlega vanstilltu batteríi sem þetta jamaíska umhverfi var," sagði Tómas og hélt áfram:

„Írska landsliðið er bara hannað til að ná sama árangri og Ísland. Þetta eru ekkert alltof frægir menn. A-landslið Íslands 2016-18 er betra heldur en Írland í dag. Við verðum að átta okkur á því. Það eru bara staðreyndir. Þeir töpuðu fyrir Englandi sem var að koma úr úrslitaleik Evrópumótsins. Þið hafið ekkert inn á sama völl og þeir að gera. Batteríið þarna er í molum og þeir eiga engan pening eftir að fjármununum var stolið af fjármálastjóranum. Þeir virðast ekki vita mikið hvað þeir eru að gera upp á skrifstofunni þarna. Andúðin beinist að stjórn írska fótboltasambandsins en er send á Heimi af því að hann tapar tveimur fótboltaleikjum."

„Hefur Írland verið að vinna mikið af fótboltaleikjum upp á síðkastið? Heldur betur ekki."

Elvar og Tómas telja að pirringurinn sem hefur beinst að Heimi sé verulega ósanngjarn.

„Þetta er uppsöfnuð reiði og pirringur gagnvart úrslitunum í langan tíma og gagnvart stjórn sambandsins sem beinist núna að Heimi sem hefur stýrt liðinu í tveimur leikjum," sagði Elvar Geir.

„Þeir vita ekkert hvað þeir vilja og eru með algjört ofmat á þessu liði. Gefið manninum smá tíma til að kenna þeim að verjast. Það væri líka fínt ef Kelleher gæti varið fótboltaskot," sagði Tómas.

Rætt var um það í þættinum að Heimir hafi gert ákveðin mistök með því að leyfa aðstoðarþjálfaranum John O'Shea að fara einn á fréttamannafund eftir leikinn gegn Englandi. Það hafi verið olía á eldinn í umræðu írskra fjölmiðla um að Heimir sé ekki nægilega ákveðinn.

Nokkrir aðilar innan írska fótboltans hafa komið Heimi til varnar - og þar á meðal þjálfari Shamrock Rovers - en alla umræðuna úr útvarpinu má hlusta á í spilaranum hér fyrir neðan.