Jasmín Erla Ingadóttir, leikmaður Stjörnunnar var að vonum sátt eftir 2-0 sigur á Þrótti R. í Bestu deild kvenna í kvöld.
„Ótrúlega sátt. Við vitum að Þróttur er með gífurlega sterkt lið og við ætluðum okkur bara að taka þessi þrjú stig og gerðum það. Þetta var frekar mikil barátta, jafn leikur. En ég held að við höfum fengið hættulegri færi svona heilt yfir," sagði Jasmín strax eftir leik.
Lestu um leikinn: Stjarnan 2 - 0 Þróttur R.
Stjörnukonur pressuðu hátt og komu Þrótturum oft í vandræði í fyrri hálfleiknum. Það var eiginlega ótrúlegt að þær hafi ekki skorað einhver mörk upp úr pressunni í fyrri hálfleiknum.
„Já algjörlega. Við hefðum getað nýtt færin okkar betur en stundum er þetta þannig að boltinn vill ekki inn, en hann fór tvisvar inn og við þökkum fyrir það."
Með sigrinum kemst Stjarnan tveimur stigum frá Breiðablik sem er í 2. sæti deildarinnar.
„Já ég meina, 6 stig í pottinum og við ætlum að taka þau öll. Svo bara bíða og sjá," sagði Jasmín Erla.
Viðtalið í heild má sjá í spilaranum hér fyrir ofan. Þar talar Jasmín meðal annars um baráttuna um gullskóinn og vítaspyrnuna sem hún fiskaði í leiknum.
