„Ég er vonsvikinn. Ég er bara vonsvikinn það er það eina sem ég get sagt núna.“ sagð Johannes Vall, leikmaður ÍA, sem skoraði eitt mark og lagði upp eitt í grátlegu 4-3 tapi á Víkingum í dag.
Lestu um leikinn: ÍA 3 - 4 Víkingur R.
Johannes er gífurlega ósáttur með markið sem var tekið af þeim í lokin. Hann segir að þetta hafi aldrei átt að vera dæmt af þeim því það var ekkert að þessu marki.
„Þetta er mjög pirrandi því við erum búnir að skoða atvikið aftur og ekkert gerðist. Þetta átti að vera mark. Svo skora þeir. Það er gífurlega pirrandi.“
Talaði Johannes við dómarann eftir leik eða fékk hann að heyra einhverjar útskýringar á málunum og þá sérstaklega markinu sem var tekið af þeim?
„Nei eiginlega ekki. Ég var á gulu spjaldi svo ég vildi ekki vera að fara og kvarta.“
Johannes segir að Skagaliðið átti meira verðskuldað úr leiknum en þetta.
„Fyrri hálfleikurinn var góður. Svo féllum við alltof langt niður á völlinn og þeir skoruðu tvö mörk. En við komum eiginlega til baka, skoruðum en við vorum alltof passífir í seinni hálfleiknum. En mér fannst við eiga meira skilið en þetta úr leiknum.“
Er eitthvað sérstakt sem Johannes er pirraður út í varðandi leikinn?
„Ég er bara pirraður að við höfum tapað leiknum.“
Sagði Johannes Vall en viðtalið má sjá í heild sinni í spilaranum hér að ofan.