Alexandra hefur skrifað undir samning sem gildir til sumarsins 2023 en Frankfurt keypti hana frá Breiðabliki. Hin tvítuga Alexandra er uppalin hjá Haukum en hún hefur spilað með Breiðabliki undanfarin þrjú ár.

Alexandra hefur skorað 28 mörk í 67 leikjum í Pepsi Max-deildinni en hún hefur einnig skorað tvö mörk í tíu leikjum með íslenska A-landsliðinu.

Frankfurt er í 6. sæti af tólf liðum í þýsku Bundelsligunni í augnablikinu en keppni hefst aftur þar í febrúar eftir vetrarfrí.

„Ég bý í íbúð með tveimur öðrum stelpum úr liðinu og þær eru búnar að vera mjög vingjarnlegar við mig."

„Ég kann vel við þýsku úrvalsdeildina, þetta er mjög sterk deild. Frankfurt er að standa sig mjög vel og hér eru góðir leikmenn. Ég tel þetta vera gott tækifæri fyrir mig. Ég vona að ég geti bætt mig sem leikmaður hérna," sagði Alexandra í samtali við vefsíðu félagsins.

Alexandra ræddi við Söru Björk Gunnarsdóttur, sem er einnig uppalin í Haukum, um þýsku úrvalsdeildina. Sara spilaði þar með Wolfsburg áður en hún samdi við Evrópumeistara Lyon á síðustu leiktíð.

Hægt er að sjá viðtalið við Alexöndru í heild sinni hérna.