„Þessi leikur (grannaslagur gegn Everton) skiptir miklu máli og þetta tap er því sérstaklega sársaukafullt," sagði miðjumaðurinn Georginio Wijnaldum eftir tap Liverpool gegn Everton í ensku úrvalsdeildinni í kvöld.
Þetta var fyrsta tap Liverpool gegn Everton í keppnisleik frá 2010 og fyrsta tapið á Anfield frá 1999.
„Í fyrsta markinu þá reyndum við að halda boltanum í staðinn fyrir að negla honum bara í burtu. Þú átt að taka minni áhættur á fyrstu mínútum leiksins. Þeir fundu sendingu í gegnum vörnina og skoruðu. Við vorum betra liðið í leiknum heilt yfir."
„Það hefur haft mikil áhrif á okkur að missa leikmenn í gegnum tímabilið. Við getum ekki verið fórnarlömb, við verðum að takast á við stöðuna og ekki vorkenna sjálfum okkur. Við verðum að halda áfram alveg til loka tímabilsins."
„Að vinna leiki í ensku úrvalsdeildinni er alltaf erfitt og meiðslin gera það ekki auðveldara. Við erum enn með hóp sem getur breytt stöðunni og við verðum að leggja mikið á okkur til þess að gera það," sagði Hollendingurinn en Liverpool er í sjötta sæti deildarinnar með 40 stig eftir 25 leiki.
Athugasemdir
