Framherjinn er eftirsóttur af mörgum stórum liðum um alla Evrópu en Girona hefur verið mest í umræðunni síðustu vikur.

Samkvæmt RadioMARCA hefur Sociedad verulegan áhuga á Orra og hefur félagið þegar hafið viðræður við föruneyti hans.

Félagið ætlaði að fá Borja Mayoral frá Getafe en hætti við það og er Orri nú með efstu mönnum á blaði.

Ítalski blaðamaðurinn Matteo Moretto hefur einnig staðfest að Sociedad sé með í baráttunni um Orra.

Orri, sem er 19 ára gamall, hefur skorað sex mörk og gefið eina stoðsendingu í níu leikjum með FCK á tímabilinu.

Ef hann fer til Sociedad verður hann annar Íslendingurinn til að spila með liðinu en Alfreð Finnbogason var á mála hjá félaginu frá 2014 til 2016. Alfreð skoraði 4 mörk í 27 leikjum á tíma sínum þar.