Ekkert vanmat hjá Víkingum - Þurfa að klára eitt verkefni til að fá gulrótina

Víkingur lagði Levadia Tallinn í gær og mætir Inter Escaldes í úrslitaleik á föstudag um hvort liðið mætir sænsku meisturunum í Malmö í 1. umferð forkeppninnar. Inter er ríkjandi meistari í Andorra.

„Ef við vinnum á föstudaginn, sem við ætlum okkur svo sannarlega, erum við komnir í 1. umferð í forkeppninni."

Seturu kröfu á að vinna Inter nokkuð sannfærandi á föstudag?

„Jú, krafan er fyrst og fremst að vinna þann leik. Ég held að þeir séu ekki nálægt því 'leveli' sem Levadia er. Stundum gerast skrítnir hlutir í fótbolta ef menn mæta með einhverjum hálfkæringi og ætla að taka þetta með annarri. Við þurfum að mæta með sama orkustig, reyna að keyra yfir þá og reyna að forðast meiðsli þar sem það er stutt á milli leikja. Það er spurning um að hreyfa aðeins við liðinu, ég veit það ekki ennþá. Það er ekkert vanmat, ég þarf að negla því inn í hausinn á þeim að það er eitt verkefni eftir til að njóta þess að fá að spila á móti Malmö."

Halldór Smári Sigurðsson, einn af markaskorurum Víkings, ræddi einnig við Fótbolta.net í gær.

„Ég sá ekki leikinn í dag [sem Inter vann] en það er mjög hættulegt að mæta í leikinn og halda að þetta verði eitthvað létt. Maður hefur oft lent í þeirri gildru í Víkingsbúningnum. Við þurfum að vera 100% stemmdir fyrir þann leik og hafa undirbúninginn eins og fyrir þennan leik," sagði Halldór.

Milos Milojevic, þjálfari Malmö, er fyrrum þjálfari Víkings.

„Ef við klárum þennan leik á föstudaginn þá bíður Malmö og það væri geðveikt að hitta Milos aftur og reyna vinna hann."

Leikurinn á föstudag hefst klukkan 19:30 og fer fram á Víkingsvelli.