Haukar unnu Selfoss, 2-1, á JÁVERK-vellinum á Selfossi í 2. deild karla í kvöld, en þetta var fyrsta tap Selfyssinga í sumar.

Selfyssingar byrjuðu vel. Miðvörðurinn Dagur Jósefsson skoraði á 13. mínútu eftir fyrirgjöf Þorláks Breka Baxter.

Adam var ekki lengi í Paradís. Ellefu mínútum síðar jöfnuðu Haukar eftir að Selfyssingar töpuðu boltanum á miðsvæðinu.

Oliver Kelaart var fljótur að senda Frosta Brynjólfsson í gegn, sem táaði boltanum í gegnum klof Robert Blakala.

Haukar fengu færin til að skora fleiri. Eitt mark var tekið af liðinu eftir rúman hálftíma en það dæmt af vegna rangstöðu. Samkvæmt lýsingu Fótbolta.net virtist Haukamaðurinn réttstæður.

Það breytti ekki miklu. Haukar héldu áfram að sækja og var það Frosti sem gerði annað mark sitt undir lok fyrri hálfleiks er hann keyrði frá eigin vallarhelmingi og lét síðan vaða með föstu skoti í fjærhornið.

Selfoss skoraði tveimur mínútum síðar en markið dæmt af þar sem boltinn hafði farið af velli í aðdraganda marksins.

Tuttugu mínútum fyrir leikslok var Frosti nálægt því að fullkomna þrennu sína en Blakala sá við honum í markinu.

Lokatölur 2-1 fyrir Hauka sem eru fyrsta liðið til að sigra Selfoss í sumar. Haukar eru í 7. sæti með 11 stig en Selfoss áfram á toppnum með 19 stig.