Monza eru nýliðar í efstu deild á Ítalíu og ætla þeir sér alls ekki að falla niður um deild á sínu fyrsta tímabili.
Adriano Galliani og Silvio Berlusconi, sem gerðu AC Milan að einu af sterkustu liðum heims um tíma, eru mennirnir á bakvið þennan ótrúlega uppgang sem hefur verið síðustu árin hjá Monza.
Félagið var að krækja í Gianluca Caprari frá Verona fyrir 10 milljónir evra. Monza borgar 3 milljónir fyrir eins árs lán og 7 milljónir til að kaupa hann eftir tímabilið.
Caprari er að verða 29 ára gamall og skoraði 12 mörk í 35 deildarleikjum með Verona á síðustu leiktíð, auk þess að gefa sjö stoðsendingar.
Auk hans er Filippo Ranocchia kominn á lánssamningi frá Juventus. Ranocchia er 21 árs með leiki að baki fyrir U21 landslið Ítalíu. Hann er algjörlega óskyldur Andrea Ranocchia, fyrrum varnarmanni Inter sem gekk í raðir Monza fyrr í sumar.
Þar að auki eru Alessandro Sorrentino og Samuele Birindelli komnir til félagsins fyrir 2,5 milljónir evra samtals.
Sorrentino er efnilegur markvörður sem er keyptur frá Pescara á meðan Birindelli er hægri bakvörður sem lék með Pisa á síðustu leiktíð.
