Thomas Tuchel var ekki sáttur með frammistöðu sinna manna eftir vandræðalegt 4-0 tap Chelsea gegn Arsenal í æfingaleik í nótt.
Liðin eru í æfingaferð um Bandaríkin og mættust þar á undirbúningstímabili sem hefur verið erfitt fyrir Chelsea.
„Við spiluðum við sterkt Arsenal lið sem var með hugarfarið upp á tíu. Við áttum ekki möguleika í þá, hvorki líkamlega né andlega, því við erum með mikið af leikmönnum sem eru að skoða sig um og vilja skipta um félag," sagði Tuchel, sem var svo spurður út í frammistöðu Kalidou Koulibaly.
„Hann var besti leikmaðurinn okkar í dag og gaf mér góða tilfinningu á slæmu kvöldi."
Næst var Tuchel spurður út í vandamálin í sóknarleiknum þar sem Chelsea virtist sjaldan gera sig líklegt til að skora.
„Við erum enn að glíma við sömu vandamál í sókninni því við erum ennþá með sömu leikmennina. Leikmenn lögðu sig einfaldlega ekki nægilega mikið fram í kvöld. Ég ætla ekki að drulla yfir strákana en þetta er bara heiðarleg greining á leiknum."