Dodo kostar 15 milljónir - Callejon farinn til Spánar (Staðfest)
Dodo í leik með Shakhtar.
Mynd: EPA
Dodo í leik með Shakhtar.
Mynd: EPA
Það er nokkuð um breytingar í herbúðum Fiorentina í sumar og er félagið búið að krækja í brasilíska bakvörðinn Dodo frá Shakhtar Donetsk.
Dodo er 23 ára gamall og gerir fimm ára samning við Fiorentina. Hann á 18 landsleiki að baki fyrir yngri lið Brasilíu og kostar rúmlega 15 milljónir evra.
Dodo er hægri bakvörður og spilaði 56 leiki á tveimur árum hjá Shakhtar. Hann er fjórði leikmaðurinn til að ganga í raðir Fiorentina í sumar eftir komu Rolando Mandragora, Pierluigi Gollini og Luka Jovic.
Spænski kantmaðurinn Jose Callejon er þá farinn á frjálsri sölu eftir að samningurinn rann út. Callejon er 35 ára gamall og gerir eins árs samning við Granada sem leikur í næstefstu deild á Spáni eftir óvænt fall í vor. Markmiðið er að komast beint aftur upp.
Callejon á tæpa 100 leiki að baki fyrir Real Madrid og 350 fyrir Napoli en hjá Fiorentina spilaði hann 55 leiki á tveimur árum. Hann á þó aðeins fimm landsleiki fyrir Spán.
