Scamacca er 23 ára ítalskur landsliðsmaður sem skoraði sextán mörk í 38 leikjum fyrir Sassuolo í ítölsku A-deildinni á síðasta tímabili.

Hann var lengi vel orðaður við franska meistaraliðið Paris Saint-Germain en þegar félagið ákvað að leita annað komst West Ham í bílstjórasætið.

West Ham náði samkomulagi við Sassuolo á dögunum og greiðir enska félagið 30 milljónir punda fyrir þjónustu hans. Scamacca stóðst læknisskoðun í dag og skrifaði í kjölfarið undir fimm ára samning við félagið.

Sassuolo mun fá 10 prósent af næstu sölu Scamacca sem er nú loks mættur til félagsins.