„Hann hafði allt; hann var fljótur, sniðugur, góð skot, spilari, skoraði mörk og gerði þetta sem 17 ára gutti. Ég hafði aldrei séð svona efnilegan dreng, svona ungan. Miðað við það efni sem maður sá þarna, þá fannst mér ferillinn hans algjörlega gaga."

Scifo fæddist í Belgíu en fór frá Anderlecht til Inter á 21. aldursári. Arnór segir að það hafi ekki verið rétta skrefið fyrir hann og fólkið í kringum hann hafi aðallega verið að hugsa um peninginn.

„Hann fer alltof snemma til Inter Milan. Hann var hálfur Ítali, fjölskylda hans kemur frá Ítalíu. Ég held að pabbi hans hafi verið einn af þessum pöbbum sem tók í taumana og stjórnaði hans ferli, og gerði allt vitlaust. Að fara til Ítalíu á þessum tíma var toppurinn , þar voru peningarnir. Ég tel að hann hefði mátt þroskast meira sem fótboltamaður hjá Anderlecht áður en hann tók þetta skref."

„Klárlega kemur í ljós með hann að hann er ekki andlega tilbúinn að fara þangað. Þú spilar ekki einn lélegan leik á Ítalíu án þess að það sé hraunað yfir þig, alla vega á þeim tíma. Hann fer eftir það til Bordeaux, en nær sér engan veginn upp. Þegar ég fór þangað, þá töluðu menn ekki vel um hann og þeim fannst hann ekki geta nokkurn skapaðan hlut."

Honum gekk betur í Auxerre í Frakklandi og fór þaðan til Torino. Hann náði hins vegar ekki þeim hæðum sem Arnór bjóst við þegar hann spilaði með honum 17 ára.