Fram mætti Íslands- og bikarmeisturum Víkings á Víkingsvelli fyrr í kvöld, leikar enduðu 2-1 fyrir Víkingum en Framarar geta verið svekktir að hafa ekki fengið neitt úr leiknum. Rúnar Kristinsson þjálfari Fram mætti í viðtal eftir leik.
Lestu um leikinn: Víkingur R. 2 - 1 Fram
„Maður fær ekki alltaf það sem maður á skilið, Víkingar eru góðir í að halda fengnum hlut. Við fengum svo sannarlega tækifærin til þess að rétta okkar hlut."
„Við áttum mjög góðan leik fyrir vestan og aftur í dag, ég er ánægður með hvernig leikmenn eru að spila og leggja mikla vinnu. Við erum að sýna framför eftir erfiðar vikur."
Nokkura mínúta töf var á leiknum vegna Brynjars Gauta sem átti að byrja leikinn í dag en rétt fyrir upphafsflautið fór Brynjar af velli og Þorri Stefán kom í hans stað.
„Hann meiddist í upphitun og kom rétt fyrir leik og lagðist á bekkinn og fékk aðhlynningu frá sjúkraþjálfara, hann hélt að hann væri í lagi en þegar hann kom aftur út í kuldann þá fann að þetta væri ekki í lagi."
Rúnar segir þetta ekki vera alvarleg meiðsli.
Viðtalið má sjá í heild sinni í spilaranum hér að ofan.
Athugasemdir
