Hjörvar Hafliðason, sparkspekingur á Stöð 2 Sport, velti því fyrir sér á twitter síðu sinni í vikunni hvaða markverðir fara með í mótið.

Ef hann væri landsliðsþjálfari tæki hann Harald Björnsson, Ingvar Jónsson og Ögmund Kristinsson.

Eyjólfur Sverrisson landsliðsþjálfari tekur væntanlega þrjá markverði með sér út en margir vilja meina að markmannsstaðan sé veikasti hlekkur liðsins.

Að mati Fótbolta.net eru það sjö markverðir sem eiga möguleika á að verða í hópnum, eins og gengur og gerist hefur hver þeirra sína kosti og galla. Við tókum saman upplýsingar um þá alla. Hvern myndir þú velja í rammann?

---

Arnar Darri Pétursson - SønderjyskE (f. 1991)
Tveir leikir í undankeppninni (tvö mörk á sig)

Í dag: Arnar Darri vermir tréverkið hjá danska úrvalsdeildarliðinu SønderjyskE og hefur ekki spilað deildarleik með liðinu í vetur.

Í fyrra: Yfirgaf norska liðið Lyn eftir að það varð gjaldþrota og gerði tveggja ára samning við SønderjyskE þar sem hann hefur verið varamarkvörður síðan.

Arnar er uppalinn Stjörnumaður, yngstur af markvörðunum sjö og er þar að auki sá eini sem er á mála hjá erlendu liði, eitthvað sem landsliðsþjálfarar vilja nú oft heillast af. Þá er hann sá eini af þeim sem hefur keppt gegn Liverpool!

Arnar lék leikina tvo gegn Skotlandi og fékk á sig mjög vandræðalegt mark í seinni leiknum ytra sem gleymist seint. Þá átti hann í miklum vandræðum með að sparka frá marki í leikjunum tveimur. Það að hann sé ekki að spila í Danmörku minnkar möguleika hans umtalsvert á að vera valinn.

Eyjólfur Tómasson - Leiknir R. (f. 1989)
Enginn leikur í undankeppninni

Í dag: Eyjólfur er aðalmarkvörður 1. deildarliðs Leiknis.

Í fyrra: Valinn besti markvörður 1. deildar. Fékk á sig 19 mörk í 22 leikjum í deildinni, fæst allra.

Eyjólfur hefur leikið tvö tímabil sem aðalmarkvörður Leiknis. Átti frábært tímabil með Leikni í fyrra þar sem liðið var hársbreidd frá því að komast upp í Pepsi-deildina. Var valinn besti markvörðurinn í deildinni en verður að horfa til þess að hann bjó við að hafa bestu vörn deildarinnar fyrir framan sig.

Hann hlaut ekki náð fyrir augum nafna síns Sverrissonar í fyrra og hefur aldrei leikið landsleik fyrir yngri landslið Íslands. Þá hefur hann ekki leikið í efstu deild sem verður að teljast mínus. Býr því ekki yfir mikilli reynslu.

Haraldur Björnsson - Valur (f. 1989)
Sjö leikir í undankeppninni (níu mörk á sig)

Í dag: Aðalmarkvörður Vals. Hefur leikið vel í vetur og virðist vera í betra standi en í fyrra.

Í fyrra: Spilaði á láni hjá Þrótti í 1. deildinni. Fékk á sig 37 mörk í 22 leikjum er liðið hafnaði í sjöunda sæti.

Haraldur er kominn aftur heim í Val eftir lánssamninginn hjá Þrótti í fyrra. Hefur staðið sig með prýði í vetur en Valsmenn unnu Reykjavíkurmótið á dögunum. Var aðalmarkvörður U21 landsliðsins í undankeppninni og er nánast hægt að bóka það að hann fari með út til Danmerkur.

Átti misjafna leiki í undankeppninni en hann var til að mynda verulega óöruggur gegn Þjóðverjum ytra og fékk falleinkunn í þýskum fjölmiðlum. Átti ekkert sérstakt tímabil með Þrótturum í fyrra. Virðist vera kominn í mun betra form í dag og er að finna taktinn vel.

Ingvar Jónsson - Stjarnan (f. 1989)
Enginn leikur í undankeppninni

Í dag: Gekk til liðs við Stjörnuna í vetur og er þar aðalmarkvörður.

Í fyrra: Valinn bestur hjá Njarðvík sem féll úr 1. deild. Hafði nóg að gera og hélt liðinu inni í mörgum leikjum.

Þessi spennandi markvörður á þrjá leiki að baki með U19 landsliðinu og einn með U21 landsliðinu en hann var 2008. Ingvar hefur verið aðalmarkvörður Njarðvíkinga síðan 2008 og vakið mikla athygli fyrir frammistöðu sína. Stjörnumenn kræktu í hann eftir að síðasta tímabili lauk.

Ingvari hefur gengið illa að halda hreinu í fyrstu mótsleikjum sínum með Stjörnunni. Liðið fékk á sig mörk í öllum leikjum Fótbolta.net mótsins og hefur hann þurft að sækja boltann sjö sinnum í eigið net í fyrstu þremur leikjum Lengjubikarsins. Þá hefur hann aldrei leikið í efstu deild.

Óskar Pétursson - Grindavík (f. 1989)
Einn leikur í undankeppninni (tvö mörk á sig)

Í dag: Aðalmarkvörður Grindvíkinga.

Í fyrra: Lék 14 leiki í Pepsi-deildinni með Grindavík. Missti sæti sitt í liðinu um mitt sumar.

Óskar hefur verið aðalmarkvörður Grindavíkur síðustu tvö ár og býr því yfir meiri reynslu úr Pepsi-deildinni en hinir markverðirnir sex. Hann lék fyrsta leik U21 liðsins í undankeppninni og á auk þess fimm leiki að baki með U19 landsliðinu.

Hann býr yfir miklum hæfileikum en hefur þótt taka litlum framförum síðustu ár. Hefur verið mjög misjafn í leikjum Grindavíkur og til að mynda átt í bölvuðu basli með fyrirgjafir. Missti sæti sitt um tíma í markinu síðasta sumar.

Þórður Ingason - BÍ/Bolungarvík (f. 1988)
Enginn leikur í undankeppninni

Í dag: Gekk í vetur í raðir 1. deildarliðs BÍ/Bolungarvíkur þar sem hann er aðalmarkvörður.

Í fyrra: Varamarkvörður hjá KR. Lék tvo leiki með liðinu í Pepsi-deildinni.

Þórður býr yfir nokkuð mikilli reynslu miðað við ungan markvörð. Var á sínum tíma í unglingaliði Everton og fór með Fjölni upp í efstu deild þar sem hann lék með liðinu eitt tímabil og spilaði meðal annars bikarúrslitaleik. Á fimm leiki að baki með U21 landsliðinu og hefur einnig leikið með U19 og U17.

Þórður hefur ekki þótt sinna boltanum nægilega vel síðustu ár og hugur hans oft legið annað. Var lánaður frá Fjölni til KR í fyrra þar sem hann var varamarkvörður og lék bara örfáa leiki. Samdi svo við BÍ/Bolungarvík í vetur.

Ögmundur Kristinsson - Fram (f. 1989)
Enginn leikur í undankeppninni

Í dag: Aðalmarkvörður Fram.

Í fyrra: Varamarkvörður Fram.

Hannes Þór Halldórsson yfirgaf herbúðir Fram eftir síðasta tímabil. Þorvaldur Örlygsson tilkynnti strax að Ögmundi yrði sýnt traust til að fylla hans skarð. Ögmundur er verulega efnilegur markvörður sem býr yfir mörgum kostum. Hefur það til að mynda að vera mjög öflugur í löppunum. Hefur leikið mjög vel á undirbúningsmótunum.

Á einn U21-landsleik að baki og tvo U19. Það sem vinnur á móti því að hann fari með til Danaveldis er að hann á aðeins 45 mínútur að baki með Fram í efstu deild og hefur aðeins komið við sögu í tveimur meistaraflokksleikjum á Íslandsmóti.