Ólafur Kristjánsson þjálfari Breiðabliks var sáttur með 4-3 sigur sinna manna gegn Stjörnunni í hörkuleik í lokaumferð Pepsi deildarinnar í dag.
Lestu um leikinn: Breiðablik 4 - 3 Stjarnan
„Við enduðum þetta á ágætis nótum og erum sáttir við það. Við vorum að mæta sennilega frískasta liði deildarinnar í sóknarleiknum. Geysilega skemmtilegt og kröftugt lið sem Stjarnan er með og það var gaman að mæta þeim. Við ákváðum að vera svolítið djarfir líka og ég held að þessi kokteill hafi boðið upp á mjög fjörugan leik,“ sagði Ólafur við Fótbolta.net.
Stjarnan stal sigrinum gegn Blikum á lokamínútunni þegar liðin mættust í Garðabæ fyrr í sumar og var því vel við hæfi að Guðmundur Pétursson skyldi skora sigurmarkið fyrir Blika í uppbótartíma í dag.
„Ég held að sá leikur í Garðabænum hafi verið ákveðin þáttaskil hjá báðum liðum, allavega hvað varðar okkar lið. Það setti okkur aðeins á afturlappirnar og braut tímabilið svolítið fyrir okkur. Það er bara jafnt á komið með liðunum að skora á síðustu mínútu.“
Ólafur viðurkennir að gengið í ár hafi verið vonbrigði en að liðið hafi þó ekki endað mun neðar en þeim var spáð fyrir tímabilið.
„Okkur var nú spáð fjórða til fimmta sæti í öllum spám fyrir mótið, þannig að við erum aðeins neðar en menn spáðu okkur. En ég get alveg tekið undir það, menn héldu kannski að við færum úr Evrópukeppnismöguleika í fjórða til fimmta sætið, en ekki úr fallbaráttunni og upp í sjötta sætið. En það sem að skiptir máli er það sem kemur upp úr hattinum í lok móts, en við þurfum að gera betur á mörgum sviðum fyrir næsta tímabil.“
En hvað þarf að gerast fyrir næsta tímabil ef Blikar ætla að ná betri árangri en í ár?
„Leikmennirnir sem að spiluðu núna þurfa að bæta sig í frammistöðu miðað við árið í ár, það var fall í frammistöðu hjá mönnum milli ára og þar af leiðandi þurfa menn að bæta sig. Þeir sem eru að koma nýjir inn þurfa að taka sinn skerf af því borði sem að boðið er upp á og það gæti verið að við þyrftum að bæta við mönnum utan frá, til þess að vera með lið sem að á möguleika í þessi lið sem eru í toppbaráttunni.“
Ólafur segir að þrátt fyrir að Blikar hafi ekki staðið undir væntingum í ár, þá sé hann hvergi af baki dottinn og hyggst hann vera áfram með liðið.
„Ég er alls ekkert af baki dottinn. Ég sé þetta sem process sem við erum í, og er með samning áfram. Að öllu óbreyttu verð stend ég við minn samning og síðan verða stjórnarmenn að sjá hvort að þeir vilji gera breytingar eða ekki. En það hefur verið stutt vel við bakið á okkur í sumar og það heldur vonandi áfram.“
