Síðdegisleikur ensku úrvalsdeildarinnar í dag var viðureign Chelsea og Englandsmeistara Manchester City.

Liverpool fór á toppinn eftir sigur á Bournemouth fyrr í dag og Man City þurfti því að minnsta kosti stig úr leiknum við Chelsea til að endurheimta toppsætið.

Manchester City var heldur sterkari aðilinn í fyrri hálfleik en það var hins vegar N'Golo Kante sem skoraði eina mark fyrri hálfleiks fyrir Chelsea á 45. mínútu þegar hann hamraði boltanum netið.

Heimamenn bættu við öðru marki á 78. mínútu og þar var að verki varnarmaðurinn David Luiz en hann skallaði boltann í markið eftir hornspyrnu, Chelsea komið í 2-0.

Ekki var meira skorað og Chelsea er því fyrsta liðið til að vinna Man City í ensku úrvalsdeildinni á þessu tímabili. Það er því ljóst að Liverpool verður á toppnum að lokinni 16. umferð ensku úrvalsdeildarinnar.

Chelsea er nú í 3. sæti með 34 stig en Man City í 2. sæti með 41. stig.