Gylfi Þór Sigurðsson er þá heldur ekki í hópnum þar sem lögreglurannsókn stendur yfir á hans málum. Hann er sakaður um kynferðisbrot gegn ólögráða einstaklingi á Englandi.

Íslenski sóknartengiliðurinn hefur verið til rannsóknar hjá lögreglunni í Manchester síðan í júlí en hann hefur ekki æft né spilað með Everton síðan.

Arnar Þór Viðarsson, landsliðsþjálfari, var spurður að því hvort leikmenn eigi afturkvæmt í landsliðið eftir alvarlegar ásakanir.

„Það var ákvörðun stjórnar með Kolbein. Ég get ekki talað fyrir þá aðila sem komu að þessari ákvörðun. Það er mikilvægt á næstu dögum og vikum að öll íþróttahreyfingin búi til ramma utan um þessi málefni öll. Ég veit að sú vinna er byrjuð og KSÍ mun að sjálfsögðu taka þátt í því."

„Þetta þarf að taka sinn tíma og það er ekki hægt að svara þessari spurningu núna. Málin eru of flókin til að hægt sé að segja eitthvað núna," sagði Arnar.

Kári Árnason sat einnig blaðamannafundinn og hann var spurður út í álit sitt að stjórn KSÍ tæki ákvörðun með leikmannahópinn.

„Ég get ekki snert á þessu máli án þess að henda einhverjum undir vagninn svo ég tel best að ég geri það ekki."

Leikur Íslands og Rúmeníu í undankeppni HM fer fram annað kvöld.