Varnarmaðurinn Wesley Fofana verður ekki með Chelsea næstu vikur vegna meiðsla aftan í læri en þetta staðfesti Enzo Maresca, stjóri félagsins, í gær.
Chelsea hefur verið í frábæru formi og á Fofana sinn þátt í því að liðið sé farið að nálgast toppliðin á ný eftir að hafa gengið í gegnum mikla lægð síðustu tímabil.
Frakkinn var að spila tólfta leik sinn í deildinni á tímabilinu er liðið mætti Aston Villa í gær en þurfti að fara af velli þegar hálftími var eftir.
Fofana lá í grasinu og hélt utan um læri sitt áður en hann bað um skiptingu. Maresca segir stöðuna ekki góða.
„Þetta eru slæmar fréttir. Hann er með vandamál í vöðva og er útlit fyrir að þetta sé aftan í læri. Yfirleitt eru þetta þrjár, fjórar og jafnvel fimm vikur. Þannig þetta er mikill missir,“ sagði Maresca.
Athugasemdir
