Það birtust fréttir í rússneskum fjölmiðlum um helgina að íslenski landsliðsmaðurinn Arnór Sigurðsson væri á förum frá CSKA Moskvu á láni til FK Khimki.
Bæði þessi félög eru í rússnesku úrvalsdeildinni; CSKA hafnaði í sjötta sæti og Khimki í áttunda sæti á síðustu leiktíð.
Arnór, sem er 22 ára, gekk í raðir CSKA frá Norrköping í Svíþjóð árið 2018. Hann skoraði bæði gegn Roma og Real Madrid í Meistaradeildinni á sínu fyrsta tímabili með CSKA.
Arnór spilaði á síðasta tímabili 31 keppnisleik fyrir CSKA, skoraði tvö mörk og lagði upp fjögur.
Skagamaðurinn hefur svarað fyrir þessi tíðindi. Hann sagði 433.is að þessar fréttir væru rangar og ekkert til í þeim.
Arnór á 14 A-landsleiki að baki fyrir Íslands hönd.
Athugasemdir