Nunez var keyptur fyrir 64 milljónir punda frá Benfica síðasta sumar en verðmiðinn getur hækkað upp í 85 milljónir punda ef ákveðnum skilyrðum er mætt.

Verðmiðinn þótti frekar hár fyrir leikmann sem hafði aðeins átt eitt gott tímabil í portúgölsku deildinni.

Úrúgvæinn byrjaði vel og skoraði strax í sigri á Manchester City í leik um Samfélagsskjöldinn og gerði slíkt hið sama í fyrsta deildarleiknum gegn Fulham.

Færanýtingin var þó langt frá því að vera góð og einblíndu fjölmiðlar á það en tölfræðin þó sýnt að hann sé stanslaust að skapa sér hættulegar stöður í sóknarlínunni og þyrfti bara að skerpa færanýtinguna.

Undanfarnar vikur hefur hann verið stórhættulegur og er liðið betra þegar hann er í liðinu en þegar hann er fjarverandi. Í gær skoraði hann tvö mörk í 7-0 sigri á Manchester United og er nú kominn með 14 mörk í öllum keppnum á tímabilinu. Klopp segir þetta aðeins vera byrjunina.

„Þetta var ein besta frammistaða sem ég hef séð í langan tíma og það gátu margir séð hversu góðir þessir strákar geta verið. Það efast enginn um hvaða áhrif Darwin mun hafa í framtíðinni því hann er algjört náttúruafl og Cody spilar á erfiðasta svæðinu á vellinum gegn liði sem spilar maður á mann og það getur verið snúið, en sjáðu bara hvernig hann heldur sér á á löppunum og býr til yfirsýn fyrir alla í liðinu. Mo er svo alltaf Mo!“ sagði Klopp.