Mótanefnd mótfallin tillögu Víkings
Víkingur leggur fram tillögu um breytingu á viðurlögum við agamálum á þá leið að leikmenn sem hafi ekki verið dæmdir í bann vegna uppsafnaðra áminninga fái gul spjöld felld niður fyrir úrslitakeppni Bestu deildanna eða Lengjudeildarinnar.

Mótanefnd KSÍ hefur gefið umsögn um þessa tillögu og er mótfallin henni.

„Áminningar og brottvísanir voru sett í knattspyrnulögin til að vernda leikmenn og er mikilvægt tæki dómarans við agastjórnun á leikvelli. Viðurlög um leikbönn í reglugerð eru svo mikilvægt tæki til stuðnings því markmiði. Með því að breyta viðurlögum á þennan hátt getur fjöldi leikmanna í hverju félagi leikið seinni hluta mótsins þannig að viðkomandi geti fengið áminningu í öllum 5 leikjum mótsins án þess að fara í leikbann. Þá þjóna viðurlögin um leikbönn ekki markmiðum sínum. Það getur leitt til grófari leiks. Þannig mögulega aukið meiðslahættu leikmanna og jafnframt gert starf dómarans mun erfiðara," segir í umsögninni.

Aðrar tillögur sem liggja fyrir snúa að fjölda erlendra leikmanna, siðareglum, sameiningu Reynis og Víðis og fleiru. Hér má sjá allar tillögurnar sem teknar verða fyrir á þinginu.

Stjórn KSÍ ræddi um framtíð Reykjavíkurmótsins
Þá hefur KSÍ birt fundargerð frá fundi stjórnar sambandsins frá 29. janúar en þar kemur fram að rætt hafi verið um framtíð Reykjavíkurmótsins.

Reykjavíkurmótið má svo sannarlega muna fífil sinn fegurri og virðing þess hefur minnkað mikið undanfarin ár. Félög hafa vísvitandi verið að tefla fram ólöglegum leikmönnum og ljóst að breyta þarf mótinu eða jafnvel leggja það niður í núverandi mynd.

„Stjórnarmenn ræddu framgöngu Víkings í Reykjavíkurmóti meistaraflokks karla, að tefla vísvitandi fram ólöglega skipuðu liði í þremur leikjum, og áhrif þeirrar framgöngu á heilindi og trúverðugleika mótsins. Stjórnarmenn skiptust á skoðunum um málið, ræddu þá stöðu sem mótið er komið í og um framtíð þess innan KSÍ," segir í fundargerðinni.

Mikill áhugi á starfi lögfræðings KSÍ
Í fundargerðinni kemur einnig fram að Eysteinn Pétur Lárusson, framkvæmdastjóri sambandsins, hafi greint frá því að 61 umsókn hafi borist um starf lögfræðings á skrifstofu KSÍ. Umsóknarfrestur er liðinn og niðurstaða ætti að liggja fyrir eigi síðar en um miðjan febrúar.

Haukur Hinriksson hefur starfað sem yfirlögfræðingur KSÍ undanfarin níu ár en hann hefur verið ráðinn framkvæmdastjóri Víkings.