Aminata Diallo og Kheira Hamraoui, leikmenn Paris Saint-Germain, eru báðar leikfærar fyrir bikarleik liðsins gegn Dijon í 16-liða úrslitum en þetta staðfestir Didier Olle-Nicholl, þjálfari liðsins.
Í nóvember á síðasta ári var Hamraoui stöðvuð af tveimur grímuklæddum mönnum og barin ítrekað með járnstöng en Diallo var með henni í för.
Diallo var handtekin af lögreglunni í Paris og færð til yfirheyrslu, grunuð um að eiga aðild að málinu. Henni var síðar sleppt og hefur neitað sök í málinu.
Síðan þá hefur rannsóknin færst yfir á Hayet Abidal, eiginkonu Eric Abidal, fyrrum leikmanns Barcelona, en hann átti í ástarsambandi með Hamraoui er hún var á mála hjá spænska félaginu.
Diallo og Hamraoui hafa ekki spilað saman síðan atvikið átti sér stað en eru báðar leikfærar, bæði andlega og líkamlega, og gætu verið í hóp PSG gegn Dijon á morgun.
„Þær eru leikfærar og klárar í leikinn gegn Dijon. Þær hafa báðar ekki spilað í meira en einn og hálfan mánuð og á meðan hefur hópurinn spilað og unnið leiki, en mér finnst að þær þurfi að koma aftur í hópinn," sagði Olle-Nicholl.
„Eftir þetta frí þá er þetta farið að líta betur og betur út og þær vilja komast aftur á völlinn. Það byrja allir á núlli. Samband leikmanna er gott og Aminata og Kheira vilja snúa aftur," sagði þjálfarinn ennfremur.
Athugasemdir