Breiðablik er komið í riðlakeppni Meistaradeildarinnar eftir frábæran sigur á króatíska félaginu Osijek á heimavelli.

Liðin gerðu 1-1 jafntefli í fyrri leiknum ytra en í kvöld byrjuðu Blikar af krafti og komust í tveggja marka forystu snemma leiks.

Hildur Antonsdóttir skoraði fyrst eftir frábæra stungusendingu frá Öglu Maríu Albertsdóttur og tvöfaldaði Taylor Marie Ziemer forystuna með föstu skoti úr vítateigsboganum mínútu síðar.

Blikar voru betri út hálfleikinn og setti Agla María þriðja markið í upphafi síðari hálfleiks eftir góða sendingu frá Tiffany McCarty. Skot Öglu var laust en markvörður Osijek missti knöttinn í netið.

Gestirnir frá Króatíu fengu fín færi en Blikar komust einnig nálægt því að bæta við mörkum og var sigurinn sanngjarn.

Breiðablik tekur því þátt í fyrstu riðlakeppni í sögu Meistaradeildar kvenna!

Dregið verður í riðlakeppnina á mánudaginn.