Fyrr í þessari viku var hópur brasilíska landsliðsins fyrir HM í Katar tilkynntur. Um er að ræða gríðarlega sterkan hóp sem er svo sannarlega líklegur til afreka á næstu vikum.
Gabriel Martinelli, leikmaður Arsenal, er valinn á kostnað Roberto Firmino, sóknarmanns Liverpool, sem er skilinn eftir heima.
Þá hefur það vakið athygli að sóknarmaðurinn Gabriel Barbosa sé skilinn eftir heima. Hann hefur skorað fjölda marka fyrir Flamengo í heimalandinu en er ekki valinn.
Gabigol, eins og hann er kallaður, hefur ekki falið vonbrigði sín á samfélagsmiðlum. Hann er greinilega verulega ósáttur.
„Það er ekki til verri óvinur en falskur vinur," skrifaði Gabigol við mynd af sér og landsliðsþjálfaranum, Tite, á Instagram. Það má gera ráð fyrir því að hann spili ekki aftur fyrir Brasilíu á meðan Tite er landsliðsþjálfari.
Athugasemdir
