Á annað hundrað fjölmiðlamanna mun vinna við landsleik Íslands og Frakklands í undankeppni EM 2020 á morgun en vegna fjöldans hefur þurft að útbúa mikið stærri aðstöðu á Laugardalsvelli.
Herbergið sem vanalega er notað undir fjölmiðlafundi í kjallara Laugardalsvallar er nú orðið vinnuherbergi fyrir ljósmyndara en 35 ljósmyndarar hafa boðað komu sína.
Fréttamannafundir verða svo haldnir í Baldurshaga þar sem skylmingaræfingar fara alla jafna fram. Þar er búið að koma fyrir stóru rými, mun stærra en áður hefur sést á landsleikjum hér á landi.
Á milli fyrstu sæta er búið að koma fyrir keilum til að byrgja ekki sýn myndbandsupptökuvéla sem eru aftast í salnum. Keilan hefur því verið dregin fram aftur en frægt varð þegar keila var á liðsmyndinni þegar íslenska liðið stillti sér upp fyrir framan Icelandir flugvélina á leið á EM 2016.
Myndirnar sem fylgja fréttinni sýna nýja herbergið og keilurnar en í heildina eru 116 fjölmiðlamenn á leiknum.
Athugasemdir