Það vakti athygli að Valgeir Lunddal Friðriksson var í miðverðinum í liði íslenska landsliðsins gegn Hollandi í gær en Valgeir er bakvörður að upplagi.
Valgeir var kallaður inn í landsliðið eftir að Hlynur Freyr Karlsson meiddist. Það kom mörgum á óvart að hann hafi verið í byrjunarliðinu þar sem Brynjar Ingi Bjarnason var valinn upphaflega í hópinn.
Age Hareide landsliðsþjálfari íslenska liðsins útskýrði valið í viðtali við Stöð 2 Sport eftir leikinn.
„Það eru nokkrir leikmenn fjarverandi vegna meiðsla svo við höfðum ekki úr mörgum leikmönnum að velja, það veldur mér miklum áhyggjum. Vonum að allir okkar leikmenn séu klárir í leikina í haust,“ sagði Age Hareide.
„Hann spilaði í þriggja manna línu með U-21 árs landsliðinu, hefur hæðina og hraðann. Hann hefur spilað vel sem bakvörður með Häcken en í svæðisvörn skiptir það ekki öllu máli. Átt að þekkja þitt svæði og vita hvað þú þarft að gera. Það er samt ekki hægt að kenna honum um neitt."
