Byrjunarlið Íslands: Höskuldur fyrirliði - Aron og Aron byrja

Ísland mætir Svíþjóð í vináttuleik á Estadio Algarve í Portúgal kl. 18:00 að íslenskum tíma en leikurinn verður í beinni textalýsingu hér á Fótbolta.net.

Um er að ræða seinni leikinn af tveimur sem íslenska liðið leikur í verkefninu, en fyrri leiknum lauk með 1-1 jafntefli við Eistland. Verkefnið er utan FIFA-glugga eins og fram hefur komið, og því kemur bróðurpartur leikmanna í íslenska hópnum frá félagsliðum í Bestu deildinni, Svíþjóð og Noregi.

Fjórir leikmenn hafa yfirgefið íslenska hópinn eftir fyrri leikinn - Guðlaugur Victor Pálsson meiddist gegn Eistlandi og getur ekki verið með gegn Svíum, og fyrirfram var ákveðið að þeir Arnór Ingvi Traustason, Nökkvi Þeyr Þórisson og Andri Lucas Guðjohnsen myndu bara spila fyrri leikinn.