Sævar Atli Magnússon.
Sævar Atli Magnússon fyrirliði Leiknis skoraði eitt af mörkum liðsins í öruggum og sannfærandi 5-0 sigri gegn 2. deildarliði Kára í kvöld.
Lestu um leikinn: Leiknir R. 5 - 0 Kári
„Þetta var ágætis leikur af okkar hálfu. Við vorum eiginlega með þá allan tímann. Í fyrri hálfleik fengum við fullt af færum. Ef við hefðum nýtt þau hefðum við farið sáttari inn í hálfleikinn," sagði Sævar eftir leikinn.
„Við töluðum um það í hálfleik að koma 100% inn í seinni hálfleikinn og klára þá á fyrstu fimmtán mínútum seinni hálfleiks, sem við gerðum. Við sýndum gæðamun."
Káramenn fengu rautt spjald í seinni hálfleik og það var kominn nokkur pirringur í menn.
„Það er óhætt að segja að þeir hafi misst hausinn. Við sjálfir vorum síðan að pirra okkur of mikið á því að þeir misstu hausinn. Við lærum af þessu."
Daníel Finns Matthíasson skoraði þrennu í leiknum ásamt því að eiga stoðsendingu.
„Danni Finns er ógeðslega góður í fótbolta og hann á eftir að vera ógeðslega góður í sumar. Ég er virkilega spenntur fyrir sumrinu, það eru mörg góð lið og deildin er miklu sterkari en í fyrra. Við höfum æft hörkuvel og hópurinn er þéttur. Ég get ekki beðið," segir Sævar Atli.
Sjá má viðtalið við hann í heild í sjónvarpinu hér að ofan en þar talar hann meðal annars um óskamótherja í næstu umferð bikarsins.
Athugasemdir
