Gary Neville, knattspyrnusérfræðingur á Sky og fyrrum varnarmaður Manchester United, heldur því fram að Manchester City þurfi að ganga frá kaupum á nýjum miðverði áður en félagaskiptaglugginn lokar.
Neville telur vandamál City liggja í varnarlínunni og býst hann við því að Josep Guardiola gangi frá kaupum á miðverði á næstu vikum.
„Það er augljóst að City vantar miðvörð, þeir verða að bæta vörnina. Liðið hefur verið algjörlega frábært í þrjú ár en núna vantar þá miðvörð fyrir titilbaráttuna," sagði Neville.
„Vörnin var ekki bara verri á síðustu leiktíð heldur voru mikið fleiri lið sem reyndu að hlaupa á hana í stað þess að reyna sendingar. Stjórn City verður að átta sig á því að liðinu sárvantar miðvörð til að verða aftur besta knattspyrnufélag Englands.
„Pep Guardiola verður að finna miðvörð til að gera City samkeppnishæft í baráttunni gegn Liverpool."
City gekk frá kaupum á Nathan Aké fyrr í haust en Neville telur hann ekki vera nóg til að laga vörn City. Aké kostaði rúmlega 40 milljónir punda.
John Stones, Aymeric Laporte og Nicolas Otamendi eru einnig á mála hjá félaginu auk Eric Garcia og Philippe Sandler.
Athugasemdir
