Pogba er kominn með sjö stoðsendingar í fjórum úrvalsdeildarleikjum en Solskjær gefur lítið fyrir þá tölfræði.

„Hvað er stoðsending? Einföld sending til hliðar þegar Bruno klárar með stórkostlegu skoti í samskeytin, eða þegar Paul gefur stórkostlegan bolta í gegn og Mason kemst innfyrir vörnina?" spurði Solskjær og vísaði þar til marksins sem Bruno Fernandes skoraði gegn Newcastle eftir einfalda sendingu Pogba, sem hvaða annar leikmaður hefði getað gefið.

„Paul hefur alltaf verið með sendingar í hæsta gæðaflokki en ég tel ekki stoðsendingar, það eru bara samfélagsmiðlar."

Manchester United heimsækir Young Boys til Sviss í fyrstu umferð riðlakeppni Meistaradeildarinnar í dag.